Vieiros

Vieiros de meu Perfil


Edición xeral

RSS de Edición xeral
CAMBIOS

Baltar quere manexar os tempos do seu adeus

Alberto Núñez Feijoo, anuncia "axustes" no PP de Ourense pero confirma a continuidade do barón provincial.

R.V. - 12:00 11/04/2008

A noutrora infalíbel máquina electoral do PPdeG en Ourense perde gas. O propio Xosé Luís Baltar recoñeceu logo das pasadas eleccións xerais que había signos preocupantes para a dereita. A pesar de ser aínda hexemónicos, os populares perderon sete puntos con respecto a 2004, cando lograran o 55% dos votos.

Ourense é a única provincia do país onde o poder interno do presidente do PPdeG, Alberto Núñez Feijoo, se ve claramente limitado. Porén, o noutrora chamado “sector do birrete” cre que agora é ineludíbel unha renovación. Este xoves comezaron os primeiros pasos. Feijoo anunciou “axustes” nos órganos de dirección do PP ourensán aínda que reafirmou o liderado de Baltar.

Feijoo quere un partido que non basee toda a súa forza no poder local. O presidente dos conservadores galegos sabe que Baltar ten a súa mellor baza nos alcaldes. Porén, tamén é consciente de que a maquinaria ourensán é indispensábel para manter algunha opción de cara as vindeiras autonómicas: “É moi difícil manter unha porcentaxe do 48% pero temos que subir dous ou tres puntos e sobrepasar o 50%”.

Baltar quere capitanear a renovación
O número un do PP ourensán declarou este venres na Radio Galega que están a buscar afiliados de base e persoas alleas ao partido. Baltar recoñece que é preciso un cambio de caras. Porén, o presidente provincial xa deixou claro que non pensa abandonar o barco nin ser un oficial máis a bordo. Con 67 anos de idade sabe que o seu tempo político non é eterno, aínda así quere manter o temón da nave ourensán até, polo menos, 2011, cando expira o seu mandato á fronte da Deputación.

Mais fontes consultadas por este xornal subliñan que na folla de ruta do ourensán está o xestionar o propio posbaltarismo, o nome do seu propio fillo volve a ruxir nalgúns cenáculos da política provincial para espanto dos “birretes” que controlan todo o aparato do PPdeG.


5/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: