Vieiros

O urbanismo salvaxe na costa mediterránea podería ter a culpa do cambio na climatoloxía desa zona, onde xa non hai tantas treboadas de verán coma antes, e na de Centroeuropa, onde aumentaron os asolagamentos. Segundo o Centro de Estudos Ambientais do Mediterráneo (CEAM), o aumento das temperaturas e da contaminación nesas costas fai que a humidade se traslade ao continente.

Segundo o director executivo do CEAM, Millán Millán, a desaparición do solo de cultivo impide que se produzan as treboadas do verán. Na costa mediterránea evapóranse uns 14 gramos de auga de mar por metro cúbico de aire, pero precísanse dez máis para que se produzan as precipitacións. Sen esa auga, o aire volve á costa, agora cargado de contaminantes e ozono, que provocan en maior medida ca o CO2 o efecto invernadoiro.

Ese vapor permanece varios días no Mediterráneo, provocando un aumento das temperaturas na súa conca, e acaba desprazándose ao centro e o leste de Europa. Segundo o experto, a falta de precipitacións na costa aumenta a salinidade do Mediterráneo, o que perturba o paso das frontes e afecta a Portugal, Galiza e ao Cantábrico.

O estudo para explicar a desaparición gradual das tormentas de verán na conca mediterránea iniciouse en 1993 por encargo da Comisión Europea. No sexto e no sétimo programa marco de investigación investíronse máis de 280 millóns de euros.