Vieiros

O investimento millonario realizado polo goberno británico para crear un sistema estatal de cámaras de vixilancia non conseguiu reducir de xeito significativo a criminalidade no Reino Unido, admitiu esta semana o xefe da sección de videovixilancia da Policía Metropolitana de Londres (Scotland Yard), Mike Neville.

A rede, con máis de catro millóns de cámaras, resultou "un fracaso total", segundo Neville, que engadiu que os criminais "non lles temen ás cámaras", informa a BBC.

O principal motivo, segundo o inspector xefe, é que existen poucos policías cualificados que poidan analizar a inundación de datos de vídeo que se recollen ao longo das 24 horas do día. Tan só o 3% dos casos de roubo en Londres foron resoltos con axuda das cámaras de vixilancia.

Os criminais parten da base de que as cámaras non funcionan na práctica, recoñeceu Neville, e dese modo anúlase o seu efecto disuasorio. "Gastáronse miles de millóns de libras para o equipamento técnico, mais non se dedicou nin un minuto a pensar como debe analizar a policía as imaxes e como deben ser usadas ante os tribunais", queixouse.