Vieiros

"Malia que a xestión e funcionamento das diferentes instalacións sanitarias galegas foi transferida xa hai anos á Xunta, que creou o Sergas, un simple paseo por calquera centro de saúde ou complexo hospitalario de calquera das nosas vilas ou cidades fainos pensar que realmente a rede sanitaria pública depende de Madrid, Castela ou Andalucía", láianse desde a Mesa pola Normalización Lingüística.

O colectivo quéixase de que alén de que a sinalización e os formularios estándar, os escritos e avisos do día a día "exclúen de xeito esmagador a lingua propia de Galiza". "O galego tamén está maioritariamente excluído na atención ao público, tanto presencial como telefónica", advirten.

Estas vulneracións foron denunciadas no Consello de Europa, argumentando que o SERGAS "conculca ostensibelmente o estipulado pola Carta Europea das Linguas Rexionais ou Minoritarias". Polo mesmo motivo, A Mesa pediulle a esta institución que inste ao Sergas "a dotarse dun plan de galeguización, no cal debe ter especial importancia un proxecto de formación lingüística para o seu persoal".