Vieiros

"Hai dous xeitos en que a democracia pode chegar a Cuba: que o pobo se levante, o que sería o acabose; ou que os militares agarren a tixola polo mango e decidan levar isto á democracia". Estas foron as palabras de Fernández Pujals nun coloquio coa prensa organizado polo Foro Iberoamérica Europa. Así, o fundador de Telepizza defendeu a posibilidade de que un golpe militar remate co réxime castrista e propicie a chegada da democracia á illa caribeña. O empresario asegura que esta é a oportunidade, atendendo ao estado de Fidel Castro: "cando os militares vexan que todos os países demócratas do mundo avogan pola democracia en Cuba, que están dispostos a apoialos e que non haberá vinganza, eu creo que se pode visualizar o cambio".

Fernández Pujals é coñecido polo seu apoio á desidencia cubana, coa que colabora dende 1999 investindo parte da súa fortuna na Fundación Plantados hasta la Libertad y la Democracia en Cuba. Despois de montar o emporio de Telepizza cunha inversión inicial de 60.000 Euros, hoxe é o presidente da empresa de internet Jazztel. De feito, a cadea pizzera xa aclarou que o empresario xa non está vencellado á propiedade da compañía dende o ano 1999, que hoxe os propietarios son Campofrío e o fondo de inversión británico Permira, ademais de adiantar que non comparten a súa visión de Cuba.