Vieiros

Este martes cúmprense dous anos da morte da xornalista rusa Anna Politkovskaia. O seu asasinato, no portal da súa casa, aínda non está completamente esclarecido na actualidade. No ano 2006, a enorme cantidade de xente que asistiu ao seu funeral coincidiu en sinalar que a mataran por contar a verdade, por se ter preocupado polas vítimas da guerra de Chechenia.

Dous anos despois, tras unha serie de detencións e procesos xudiciais que aínda non remataron, xa son menos os que seguen a pedir xustiza, entre eles os familiares da vítima.

A primeira detención produciuse case un ano despois do crime. A Policía detivo a Shamil Buraiev, que fora candidato pro-ruso ás eleccións chechenas, baixo a acusación de lle ter dado o enderezo da xornalista aos presuntos asasinos. Porén, atópase en liberdade por carecer de antecedentes. Outra ducia de implicados tamén foron arrestados e ceibados por falta de probas.

Na actualidade, tres persoas están procesadas e pendentes de xuízo: Serguei Jadzhikurbanov e Dzhbrail e Ibraguim Mahmudov. Un terceiro irmán dos anteriores, Rustam, está baixo orde internacional de busca e captura como presunto autor material do asasinato, despois de saír do país cun pasaporte en vigor.

Estes días coñeceuse, ademais, que o asasino xa se cruzara con Politkovskaya días antes do crime e que estivo a preparar a execución, con simulacros diante da súa porta, segundo confirmaron gravacións de cámaras de seguridade.

Pero o que non se sabe é quen mandou matar a xornalista, crítica coa política do goberno ruso en Chechenia.

A familia de Politkovskaia segue a pedir xustiza, porque no banco dos acusados aínda non están os verdadeiros responsábeis da súa morte, e pregoulles aos medios de comunicación que non esquezan o caso.