Vieiros

Vieiros de meu Perfil


Edición xeral

RSS de Edición xeral
Proclamación oficial do candidato

Xoán Gato confirmado como cartel de Terra Galega para as eleccións

O rexedor naronés subliña a intención do partido de ser "a nova vía para normalizar unha terra considerada como unha reserva de votos para os partidos estatais".

Redacción - 10:30 28/12/2008

"Ábrese unha nova vía para normalizar unha terra considerada como unha reserva de votos para os partidos políticos estatais e na que o PSOE comparte goberno co BNG, un partido sen apelidos que non ten definición ideolóxica e que só busca o poder". Así falaba este sábado Xoán Gato, tamén alcalde de Narón, durante a súa proclamación oficial como candidato de Terra Galega ás eleccións do próximo 1 de marzo.

Aproveitou de feito o naronés para reivindicar o municipalismo como "motor do país", salientando o "exemplo" do concello que el mesmo goberna e do que destacou que "medrou mentres a veciña Ferrol languidecía, grazas ao poder dos veciños, nun modelo que podería ser traspasábel a numerosos concellos do país". Ao fío, debullou as liñas do que será o programa da formación, resumindo que se baseará "na austeridade orzamentaria, cunha política industrial activa, na que os galegos teñan dereito á transformación dos seus produtos, aproveitando as súas fortalezas, cunha nova política de Investigación e Desenvolvemento, transformando unha universidade que vive ás costas de Galiza e que manda os seus titulados ao paro, e logralo nun país cunha verdadeira vertebración do territorio, consolidando as comarcas como eixo vertebrador".

"Vivimos nun edificio chamado Estado español, pero non queremos estar para limpar as escaleiras e facer os recados", apuntou tamén Xoán Gato, prognosticando que Terra Galega será o partido que leve ao Parlamento "o que se di nos bares, na casa e nas rúas". Laiouse Gato de que a converxencia con outras zonas do Estado "perde forza" e propuxo que a formación que lidera aposte por tirar de Galiza para axudar a que "esperte do seu sono". "Galiza non pode perder máis tempo, porque foi domada e castrada porque lle dixeron que todo o que viña de fora era mellor e que o que nos facíamos era malo".

De paso, afondou o candidato de Terra Galega nas críticas ao actual goberno, reprochándolle que "prometeran un cambio e ofreceran unha ilusión e esperanza e lamentabelmente foi esta a lexislatura da paralización do desenvolvemento económico e social de Galiza, cos presupostos máis desbaldidores da historia do Estatuto de Autonomía, do grande clientelismo político, o caciquismo e o amiguismo, con máis de 6.000 millóns en subvencións, o que significa que se multiplicou por dous o clientelismo da época de Manuel Fraga".


Ligazóns

5/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: