Vieiros

A Audiencia de Barcelona decretou esta cuarta feira liberdade baixo fianza de 50 mil euros para Enric Duran, o activista catalán coñecido como o estafador solidario, ante o perigo de fuga que o xuíz presume. Porén, Duran xa sinalou que non ten intención de pagar a fianza, porque a considera "inxusta", e que tampouco desexa fuxir, senón que quere ficar para se enfrontar a un xuízo no que pretende denunciar o fracaso do sistema económica e financeiro actual.

Enric Duran, que está acusado de delitos de estafa continuada e de falsidade documental, emitiu un comunicado no que se laiaba de que o tribunal puxese prezo á súa liberdade, explicando: "Non teño cartos para pagar a fianza, porque din todo aquelo que tiña. Polo tanto, a xente que me apoia e máis eu, imos valorar que camiño debemos seguir en relación a esta fianza, anticipando, en todo caso, que sería unha estratexia coherente coa miña acción de insubmisión á banca non pagala. Ao mesmo tempo, imos seguir traballando para que os xuíces reconsideren as súas decisións, e me outorguen liberdade provisional sen fianza. E mentres non haxa novidades, por unha vía ou por outra, hei continuar en prisión".

A historia do Robin dos Bancos
Enric Duran, conseguiu case medio millón de euros en créditos de 39 bancos, que foi recadando durante máis de dous anos, e despois fuxiu. Aínda así, unha parte do diñeiro destinouno a publicar Crisi, unha revista que se repartiu de balde o 17 de setembro e que se pode descargar da web 17-s.info. A publicación informa de como nos 'rouban' os bancos e como facer para darlle a volta á situación. De feito, conta como fixo para conseguir todos eses cartos, que non pensa devolver, e para criticar o sistema bancario. Outra parte do diñeiro dooulla a movementos sociais. Duran explica que a súa estafa é un novo xeito de desobediencia civil.

Este activista, que pasou a ser coñecido coma o estafador solidario ou Robin dos Bancos, foi detido o 17 de marzo, mentres impartía unha conferencia no Reitorado da Universidade de Barcelona, ocupado polos estudantes que protestaban contra Boloña.