Vieiros

O líder indíxena Alberto Pizango atopábase en paradoiro descoñecido dende a pasada sexta feira, cando un enfrontamento entre a policía peruana e varios colectivos indíxenas da selva amazónica se saldara coas mortes de uns 30 civís e polo menos 20 axentes -segundo datos do goberno.

Porén, esta terza feira sóubose que Pizango está refuxiado na embaixada de Nicaragua en Lima. Sobre el pesaba unha orde de busca e captura, ditada polo goberno de Alan García, e as autoridades peruanas mantiñan a hipótese de que se atopaba en Bolivia.

Resistencia indíxena no Perú
O líder indíxena, que encabezou a revolta pola defensa dos asentamentos tradicionais das comunidades amazónicas no Perú, acusara a pasada sexta feira ao presidente do país, Alan García, de xenocidio. A Asociación Interétnica de Desenvolvemento da Selva Peruana (Aidesep), da que Pizango é presidente, e que organizou a resistencia dos indíxenas na rexión amazónica de Bagua, ao norte do Perú, cifrou o número de mortos nos enfrontamentos coa policía, entre nativos e outros civís, en, polo menos, unha trintena.

As comunidades amazónicas comezaron o pasado 9 de abril unha protesta contra a ocupación dos seus asentamentos tradicionais, que incluía, de momento, o corte de estradas, o bloqueo dos rías e a toma de xacementos de gas e petróleo.

A mobilización armouse para demandarlle ao Congreso do Perú que derogue varias leis aprobadas polo goberno para axeitarse ás condicións do Tratado de Libre Comercio cos EUA, dirixidas a incentivar o investimento privado nas zonas ricas en petróleo e gas, Os indíxenas consideran que estas normas afectan o seu dereito a unhas terras que conforman os seus asentamentos históricos.

Máis información:

• La República: ONG denuncia que PNP hizo desaparecer cadáveres en Bagua
• Enlace Nacional: Presidente García compara represión amazónica con lucha contra enemigos extranjeros
• Noticias de Bagua: Última hora da rexión onde se deron os enfrontamentos
• Perú Indymedia: Masacre en la Amazonia / Nicaragua otorga asilo diplomático a vocero indígena Alberto Pizango
• Na web da Aidesep: Apu Alberto Pizango Chota, presidente de AIDESEP, se asiló en la Embajada de Nicaragua