Vieiros

Uns 115 cidadáns romaneses afincados en Belfast están refuxiados dende a pasada noite nunha igrexa protestante da cidade, coa intención de fuxir dos ataques racistas que sufriron os últimos catro días. As forzas de seguridade irlandesas axudaron ás 20 familias a abandonar o seus fogares situados na área de Lisburn, ao sur da cidade, despois de ser vítimas de ataques con botellas e ladrillos. Ademais, moitos atoparon nas súas caixas de correo exemplares do libro Main Kampf, escrito por Adolf Hitler no 1925. Ademais, na noite do martes grupos de mozos de extrema dereita lanzaron botellas mentres facían o saúdo nazi a veciños da cidade, que participaban nunha protesta pacífica contra os ataques aos inmigrantes.

Ante esta situación as familias trataron de xuntarse nunha casa da zona, pero todos non collían na vivenda e foi ese o motivo polo que pediron axuda a unha igrexa protestante do lugar. O pastor desta igrexa, Malcolm Morgan, lamentou os incidentes e animou aos seus veciños a contribuír neste contexto e "amosar o outro lado, o lado solidario de Irlanda do Norte". Pola súa parte, a alcaldesa da cidade, Naomi Long, cualificou como "totalmente inaceptábeis" os feitos acontecidos e animou aos veciños dos barrios do sur a saír á rúa para protestar.

A Policía pide a colaboración cidadá
En nome da Policía falou o inspector xefe Robert Murdie, e considera que non existe unha campaña organizada contra estas empresas, pero si que recoñeceu informacións sobre a implicacións de grupos racistas como Combat 18. Murdie explicou que están buscando nas cámaras de circuíto pechado imaxes que axuden á identificación dos autores, e instou aos veciños a colaborar nesta labor xa que, as autoridades pensan que os culpábeis son veciños da zona. Tamén anunciou que aumentarán a seguridade na zona para evitar conflitos nos vindeiros días.

• Información no Irish Times

• Información na páxina da BBC