Vieiros

Vieiros de meu Perfil


Galego.org

Xestionado por Vieiros
RSS de Galego.org
Proposición non de lei

O BNG insta o Parlamento a condenar as "proclamas antigalegas" da FAES

A fundación que lidera o ex presidente do goberno español José María Aznar mesmo cuestiona a propia existencia da nosa lingua.

Redacción - 17:30 22/06/2009
Bieito Lobeira e José María Aznar

Bieito Lobeira e José María Aznar

O deputado do BNG Bieito Lobeira presentou unha proposición non de lei para que o Parlamento manifeste "a súa máis enérxica condena e rexeitamento ás proclamas xenófobas e antigalegas" por parte da fundación FAES, vinculada ao PP.

Lobeira instou a Xunta a que "utilice as medidas necesarias para que a fundación FAES cese de inmediato coas súas actitudes manifestamente hostís á diversidade nacional, lingüística e cultural" do Estado, informou este luns o BNG nun comunicado.

En concreto, pediu "respecto" para "o dereito do pobo galego á súa existencia política e ao exercicio pleno dos seus dereitos lingüísticos e culturais".

Lobeira denunciou que a FAES, liderada polo ex presidente do goberno español José María Aznar, "utiliza a arma do racismo e da xenofobia para atacar, insultar e humillar os galegos nas súas publicacións e informes".

Cuestionamento da existencia do galego
Como exemplo, o deputado do BNG reprochou que a FAES "cuestiona a existencia do idioma galego, o que considera unha suma de variantes lingüísticas galaicas que, por comodidade, chamabamos galego".

Segundo o BNG, a FAES "ataca directamente" o Estatuto de Autonomía, que estabelece que o galego é a lingua propia de Galiza. Para a FAES, dixo Lobeira, o concepto de lingua propia é "unha idea predemocrática que lexitima a prevalencia dunha das linguas con respecto á outra que, para máis inri, é a única lingua oficial do Estado".

O nacionalista engadiu que, ademais, esta fundación "critica as políticas de discriminación positiva a prol do galego, a lingua que está en situación de inferioridade, comparándoo co nulo efecto que estas políticas tamén tiveron sobre as mulleres e os negros".

A FAES, a fundación "máis subvencionada"

Tamén recordou que a fundación FAES "é a máis subvencionada polo Ministerio de Cultura do Goberno español", e que este ano recibirá 2,68 millóns de euros para fomentar as súas actividades, cantidade á que hai que engadir outros recursos dos ministerios de Asuntos Exteriores e de Educación.

Por iso, considerou "hipócrita e cínico" que a FAES defenda a supresión das axudas á lingua galega, cando esta fundación "recibe unha cantidade moi importante de recursos públicos" en concepto de subvención.


4.95/5 (20 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: