Vieiros

Vieiros de meu Perfil


Venezuela

Edición xestionada por Xurxo Martínez Crespo
RSS de Venezuela
SEGUNDO O PRESIDENTE VENEZUELANO HUGO CHÁVEZ

"Oligarquía venezuelana apoia golpe hondureño para reeditalo en Venezuela"

O presidente venezuelano, Hugo Chávez, declarou nun acto de ascensos militares na cidade de Maracay, que a oligarquía venezuelana respalda o golpe hondureño e que xustificaría a reedición do golpe de Estado en Venezuela. 

Xurxo Martínez Crespo - 10:33 01/07/2009

"É o mesmo que está acontecendo hoxe en Honduras e é o mesmo que a oligarquía venezuelana quere que volva a acontecer. Eles pretenden reeditar o golpe de Estado", traeu a colación ao mencionar a asonada da que foi obxecto o presidente hondureño, Manuel Zelaya, por parte dun grupo de militares e civís de Honduras.

Criticou a complicidade das análises da prensa escrita, radio e televisión, os cales, dixo o presidente venezuelano, "están á medida dos golpistas". Algúns media venezuelanas continuan dicindo en Venezuela que en Honduras non hai un golpe de Estado, o que traduciu o xefe de Estado como unha maneira de aboar o camiño para que se dea un novo golpe de Estado en Venezuela.

"Claro, porque eles queren que aquí aconteza o mesmo! É o mesmo formato. Aquí van quedar coas ganas por 200 anos e máis! Se se lles ocorre, verán que atoparán á Fuerza Armada e co pobo", advertiu o presidente venezuelano.

Para facer fronte á trampa da oligarquía, exortou a seguir afortalando a unidade nacional, o pobo, á Fuerza Armada co pobo, á rede de campesiños e campesiñas, de obreiros, de intelectuais, de profesionais, mestres, científicos, pais, nais, a toda a familia venezuelana.

"Trátase diso, cadetes da Escuela Técnica Militar, ministros, gobernadores. Trátase diso: de ter ou non ter Patria. E nós estamos dispostos a ter Patria e a contribuír a crear a gran Patria latinoamericana e caribeña que hoxe é agredida alá (Honduras). Para nós a Patria é América".

Posición de militares hondureños


O presidente, Hugo Chávez, lamentou que militares hondureños non se colocaran abertamente ao carón do pobo, cando xa a Asemblea Xeral da Organización de Nacións Unidas (ONU) celebrou unha sesión de urxencia para condenar  o golpe de Estado en Honduras, e chamou á comunidade internacional a non recoñecer outro Goberno no país centroamericano que non sexa o do presidente Manuel Zelaya.

O presidente venezuelano comentou que hoxe "o pobo está nas rúas protestando, coa lamentábel diferenza que non hai militares hondureños que se coloquen abertamente ao carón do pobo".

Resaltou a existencia de militares patriotas en América Latina, malia que é "unha hora de proba para o pobo e os soldados de Honduras", a quen recomendou "darse de baixa do imperio estadounidense".

"Deben darse de baixa do imperio estadounidense e conectarse coas raíces de Morazán", subliñou, ao comparar aos soldados de Honduras  coa estrutura militar venezuelana.

Apuntou que toda venezuelana ou venezuelano debe considerarse un combatente, pois trátase —sinalou o presidente Chávez— de que "todos somos o gran soldado, o colectivo, o gran pobo colectivo. Dese xeito non haberá imperio, gorilismo, pitiyanquismo nin guerra psicolóxica que poida connosco".
 
Exortou á oligarquía venezuelana a non enganarse, a mesma advertencia que o xefe de Estado lle fixo aos sectores opositores xusto antes do golpe de Estado que argallaron sectores fascistas contra o Goberno venezuelano o 11 de abril de 2002.




4,43/5 (7 votos)