Vieiros

Varias ducias de membros do Foro Social de Cangas e doutros colectivos contrarios á construción do porto deportivo de Massó concéntranse dende as 8.00 horas desta cuarta feira fronte ás obras da infraestrutura, para impedir o paso de camións.

Segundo explicou o voceiro do Foro, Tiago Pérez, as mobilizacións continuarán, tal e como se decidiu na última asemblea desta plataforma, este martes á tarde, embora as cargas da Garda Civil, que ademais detiveron 16 persoas hai dous días, e as imputacións.

Á última hora da mañá desta cuarta había dous camións parados. Tiago Pérez confirmou que, polo momento, non había presenza policial.

Ademais, informou de que está prevista unha concentración fronte ao Concello, ás 17.00 horas, onde haberá unha xuntanza entre representantes da Confraría de Pescadores de Cangas e os voceiros dos grupos do Goberno municipal (BNG, PSdeG e Alternativa Canguesa de Esquerdas).