Vieiros

Vieiros de meu Perfil


Edición xeral

RSS de Edición xeral
Argumenta que está "fóra de prazo"

O PP vetará o caso de Gondomar na xuntanza do Pacto Antitransfuguismo

A Comisión de Seguimento manterá esta quinta feira unha nova reunión ordinaria, onde se analizará o caso de Abegondo.

Redacción - 09:30 23/07/2009

A Comisión de Seguimento do Pacto Antitransfuguismo manterá esta quinta feira unha nova reunión ordinaria na sede do Ministerio español de Política Territorial, onde se analizará a moción de censura en Abegondo (A Coruña). O PSOE pretende tamén levar o caso de Gondomar (Vigo), mais o PP xa avanzou que se negará por estar "fóra de prazo".

No municipio de Abegondo, o ex conselleiro popular Manuel Santiso Miramontes aliouse cun edil que fora elixido na lista socialista para asinar unha moción contra o independente Xoán Xosé Rocha e arrebatarlle o bastón de mando o pasado mes de abril.

En Gondomar, a principios deste mes, os edís elixidos na lista do PP, con catro concelleiros do PSOE e un independente, arrebatáronlle a alcaldía ao BNG. Os edís socialistas foron expulsados do partido, mentres que os populares solicitaron a baixa voluntaria do partido.

Na última xuntanza, no mes de Nadal, a Comisión de Seguimento do Pacto Antitransfuguismo xulgou como un caso de transfuguismo o de Pobra de Trives (Terra de Trives), onde o PP apañou a alcaldía co apoio de dous concelleiros elixidos na lista do PSOE, mentres que decidiu remitir ao comité de expertos o caso de Mos (Vigo), onde o PP lle quitou ao PSdeG o bastón de mando co apoio dun edil que fora elixido pola candidatura socialista.

A reunión desta quinta feira estará presidida polo vicepresidente terceiro e ministro de Política Territorial, Manuel Chaves, e contará coa asistencia de dirixentes dos partidos políticos con representación parlamentaria. No Pacto son os representantes das distintas formacións os que propoñen os casos a estudar e tratan de alcanzar un consenso. Posteriormente o Ministerio difunde un informe sobre as vulneracións do acordo.


5/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: