Vieiros

O Banco Central Europeo (BCE) revisou esta quinta feira á alza as súas previsións de crecemento e inflación para 2009 e 2010, aínda que mantivo a prudencia e a cautela respecto da recuperación económica, polo que manterá os tipos no 1% algún tempo.

O presidente do BCE, Jean-Claude Trichet, dixo que "os indicadores para o terceiro trimestre de 2009 apoian a idea de que a economía da zona euro se estabiliza máis".

Por iso e debido a que o comportamento da actividade económica foi no segundo trimestre mellor do esperado, o BCE revisou notabelmente á alza os seus prognósticos de crecemento para este ano e o próximo.

Trichet explicou que o consello de goberno do BCE decidiu previamente por unanimidade deixar inalterado por cuarto mes consecutivo o prezo do diñeiro no 1%, un nivel historicamente baixo, para apoiar o incipiente crecemento económico.