Vieiros

O presidente brasileiro, Luiz Inácio Lula da Silva, exixiulle ao goberno golpista hondureño que respecte a integridade da embaixada de Brasil en Tegucigalpa, onde permanece refuxiado Manuel Zelaya. Os servizos de auga, electricidade e teléfono na zona da sede diplomática foron cortados.

"Esperamos que os golpistas non entren", afirmou Lula, que está a realizar intensas xestións na sede da ONU, en Nova York, onde pronunciará esta cuarta o discurso de apertura da Asemblea Xeral, para que o réxime de Roberto Micheletti acepte iniciar unha negociación co presidente constitucional hondureño, informa a Folha.

Ao respecto, o chanceler Celso Amorim, que acompaña o Lula na súa viaxe, sostivo que Brasil non tolerará ningunha acción en contra da súa embaixada en Tegucigalpa. Ademais, segundo a axencia ANSA, o Executivo brasileiro pediu unha reunión urxente ao Consello de Seguridade da ONU.

"Considerando as medidas tomadas, o meu Goberno está preocupado pola seguridade do presidente Zelaya e pola seguridade e a integridade física do persoal da embaixada e as instalacións da sede", reza a petición realizada pola embaixadora brasileira ante a ONU, Maria Luiza Ribeiro Viotti.

Plan de asasinato
Por outra banda, Zelaya denunciou a existencia dun plan dos golpistas para tomar o edificio, capturalo e asasinalo. "Xa teñen dispostos mesmo os forenses para declararen que foi un suicidio", sinalou nunha entrevista a Telesur. 

Ademais, cualificou de "manipulación" a oferta de Micheletti de iniciar conversas, condicionadas polo recoñecemento da legalidade dos comicios convocados para novembro. 

Nas rúas, grupos de manifestantes desafiaron o toque de queda, e producíronse numerosas detencións. Xa pola mañá, este martes, a Policía cargou contra os centos de persoas reunidas arredor do edificio.

Xornalistas galegos na fronteira
Segundo informan no seu blog, cinco xornalistas da Asociación Galega de Reporteiros Solidarios (Agareso) permanecen en Nicaragua á espera de poder cruzar a fronteira con Honduras, onde se dirixían para realizaren reportaxes sobre a vida dos pescadores do Golfo de Fonseca.

"A noticia deixounos dunha peza", afirman sobre o regreso de Celaya xa que lles impide "continuar co noso labor". "E o peor é ver como a decisión dunha soa persoa pode cambiar todo o que outros centos organizan", lamentan.

• Máis información: La prensa | El Heraldo | El Tiempo | La Tribuna | Telesur