Vieiros

Vieiros de meu Perfil


Edición xeral

RSS de Edición xeral
Velupillai Prabhakaran, morto o 18 de maio

Sri Lanka nega que o líder dos Tigres Tamil fose executado após se render

O goberno libera catro mil dos case 300 mil tamiles presos en campos de concentración, logo de pediren os EUA unha investigación sobre supostos crimes de guerra.

Redacción - 14:10 26/10/2009
Velupillai Prabhakaran, morto

Velupillai Prabhakaran, morto

O goberno de Sri Lanka rexeitou este luns novas acusacións sobre supostas torturas e execución do líder dos Tigres Tamil (LTTE), Velupillai Prabhakaran, por parte das forzas de seguridade do estado logo de se render.

O Exército de Sri Lanka anunciou o pasado 18 de maio a morte de Prabhakaran, que durante 37 anos liderou a organización independentista armada na procura dun estado propio para a minoría tamil fronte a maioría cingalesa da illa.
As novas acusacións realizounas esta fin de semana a web estadounidense Sri Lanka Guardian, que cita tres fontes: un gardacostas de Prabhakaran e dous oficiais do servizo de intelixencia e do ministerio de Defensa.

Porén, este departamento -segundo recollen axencias internacionais- emitiu un comunicado en que sinala que existe unha campaña para publicar "historias inventadas" co fin de levar os militares ante os tribunais por crimes de guerra.

O Departamento de Estado (ministerio de Exteriores) dos EUA elaborou un informe hai poucos meses onde consideraba que tanto os Tigres Tamil como o goberno de Sri Lanka puideron cometer crimes de guerra na fase final do conflito armado, incluída a execución de líderes independentistas que acordaran unha rendición.

Campos de concentración

O Executivo da illa liberou a semana pasada catro mil dos case 300 mil tamiles presos en campos de concentración desde o final do enfrontamento. A liberación chegou logo de que o goberno estadounidense pedise unha investigación sobre os supostos crimes de guerra que, considera, "acusacións críbeis".

Entre sete mil e 20 mil civís tamiles morreron entre xaneiro e maio deste ano, e máis de 100 mil desde que comezara o conflito.


4.2/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: