Vieiros

Vieiros de meu Perfil


Edición xeral

RSS de Edición xeral
700 mil cidadáns chamados a votar

"Esta vostede a favor de que Cataluña sexa un Estado soberano, social e democrático?"

Velaí a pregunta que os veciños de 170 localidades catalás atoparán este domingo na papeleta do referendo.

Redacción - 09:00 13/12/2009

Serán arredor de 700 mil cidadáns en 170 poboacións os chamados a votar o próximo domingo 13 de decembro en Cataluña no referendo sobre a independencia. Un total de 20 mil voluntarios atenderán 500 mesas electorais repartidas en todo o país.

"A chama do independentismo vaise estender". Subliñábao este sábado Ramón Vilalta, o alcalde de Sant Jaume de Frontanyà, o máis pequeno concello de Cataluña, que de xeito simbólico celebrou a súa votación na véspera da xornada de referendo que este domingo leva a pregunta a arredor de 700 mil cidadáns en 170 localidades diferentes. A xornada contará co apoio de 20 mil voluntarios que atenderán 500 mesas electorais repartidas en todo o país. Nesa primeira votación en Sant Jaume de Frontanyà, e con só 24 veciños censados, acudiron ás urnas 19 dos 21 con dereito a voto (os outros tres son menores de idade). Revisadas as 19 papeletas, o reconto: 18 votos para o "si" e un só voto para o "non". "Un éxito fabuloso", valorou Vilalta, para quen esta experiencia é un chanzo clave para "ampliar a conciencia" cidadá ao respecto da necesidade de que, nun futuro, poida realizarse unha consulta oficial e vinculante sobre a independencia de Cataluña.

A faísca que trouxo á lumeirada democrática deste 13 de decembro acendérase o pasado mes de setembro na localidade de Arenys de Munt. Aló, o electorado votou masivamente a prol da independencia de Cataluña. Un 41% do censo de 2.671 votantes potenciais acudiu ás urnas, saíndo o "si" maioritario cun 96% dos votos. O éxito daquela xornada e o propio debate social aberto ao fío, animou á chamada Coordinadora per la Consulta sobre la Indepèndencia ao ambicioso despregue deste mes de decembro. Sen subvencións públicas e con só doazóns persoais e o traballo de voluntarios, Cataluña vivirá así unha auténtica festa democrática abrollada da sociedade civil catalá.

Para ampliar:



Na prensa internacional:


4.93/5 (15 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: