Vieiros

Vieiros de meu Perfil


Edición xeral

RSS de Edición xeral
Non haberá decisíón antes da primavera

A Xunta teme a contestación social a unha segunda planta de Sogama no sur

O aforro no transporte do lixo e a saturación do complexo de Cerceda aconsellan a descentralización.

Redacción - 09:25 24/01/2010

Os gobernos Fraga, o bipartito e agora o de Núñez Feijoo enfróntanse a un sempiterno problema: que facer cun sistema de tratamento do lixo que está totalmente saturado e se revela como pouco eficiente? O modelo centralizado en Cerceda, municipio ao que chega o lixo de todo o país, leva anos facendo augas. Se Sogama xestiona 900 mil toneladas de lixo, a planta cercedense só ten capacidade para facerlle fronte, no mellor dos casos, a 500 mil. Unha boa parte dos residuos sobrantes van parar directamente ao polémico vertedoiro da Areosa dende hai case unha década.

O Goberno xa deixou claro que non pensa prescindir da incineración de residuos. Os colectivos ecoloxistas exixen unha progresiva diminución desta (até a súa eliminación en 2017) e a construción de plantas comarcais de compostaxe. Mais a aposta da Xunta é clara: ou se amplía a capaciade da planta de Cerceda ou se constrúe unha nova no sur que trate o lixo que se xera en Ourense e Pontevedra.

A Consellaría de Medio Ambiente tiña anunciado que tomaría unha decisión antes de que rematase o ano. Esta mesma semana o conselleiro Agustín Hernández recoñecía que o Goberno non revelará a elección antes do verán. Porén, como se tratase de sondear á opinión pública, falaba de que no sur do país había “un centro de gravidade” na xeración de residuos, en referencia á área metropolitana de Vigo.

Temor á reacción social
Un dos temores da creación de novas plantas de tratamento de residuos é a contestación social que poden ter. Eis o principal atranco que ten a Xunta á hora de decidir un municipio do sur do país. A prol dunha decisión deste tipo sería o importante aforro de transporte. No seu día o Consello de Contas advertiu que a centralización actual no tratamento de residuos era antieconómico e incluso antiecolóxico, xa que as directrices recomendan unha xestión de proximidade.

A segunda opción sería a ampliación da planta de Cerceda, coa instalación de novas caldeiras para incinerar os residuos. O propio alcalde, Xosé García Liñares, defende esta opción ao estimala a “máis lóxica”. Na súa báscula prioriza os investimentos e novos empregos asociados a este proxecto.


5/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: