Vieiros

Vieiros de meu Perfil


Edición xeral

RSS de Edición xeral
CONGRESO PROVINCIAL

Xosé Luís Baltar prognostica que seu fillo gañará co 70% dos votos

O aínda presidente provincial do PP asegura que o partido sairá fortalecido e que continuará na súa liña gañadora. Ademais, opina sobre o decreto do galego. Video no interior.

Isabel G. Couso - 12:15 29/01/2010

“O que se decide esta fin de semana en Ourense non é o futuro do PP”, asegura ás cámaras de Vieiros o presidente provincial do PP e presidente da Deputación ourensá, Xosé Luís Baltar. O que se decide, nas súas palabras, é o nome do novo dirixente, porque o futuro da formación vai seguir sendo o mesmo, o dun “partido netamente gañador”.

Mentres a competición entre Xosé Manuel Baltar e Xoán Manuel Jiménez Morán polo poder popular ourensán recrúa, o máximo expoñente en activo do chamado sector da boina prognostica, sen dubidar, a continuidade do baltarismo. Sen vacilar, responde co nome de seu fillo á pregunta de quen será o seu sucesor no cargo e adianta unha vitoria nada axustada para este sábado: “en porcentaxes, un 70% fronte ao 30%”, augura.

Alén de reflectir algún tipo de tensión, Baltar apela reiteradamente a palabras como “acto democrático” ou “contraste de ideas” para adiantar que o PP sairá do congreso provincial “unido para procurar os mellores resultados”.

Decreto do galego
Tamén opina Xosé Luís Baltar sobre a actual polémica en torno ao decreto do galego no ensino. O presidente da Deputación defende que o proxecto da Xunta é o de manter a aprendizaxe nun 50% en cada unha das dúas linguas oficiais, o galego e o castelán. “Cando se falou do plurilingüismo”, di, “era co obxecto de aplicalo máis adiante, como unha meta”.

O único que lle apón ao anterior goberno bipartito, explica, era o de “querer impor” e asegura que toda esta polémica non ten porque prexudicar a imaxe da nosa lingua entre os galegos: “o único que temos que facer é facer que as novas xeracións non o entenden como un traballo máis, senón que se sintan orgullosos de presumir de que somos un país bilingüe, distinto aos demais”.


4.33/5 (6 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: