Vieiros

Vieiros de meu Perfil


Edición xeral

RSS de Edición xeral
Dinamarca

Posibelmente o mellor choio do mundo (até o de agora)

Os traballadores de Carlsberg, o cuarto maior fabricante de cervexa, protestan pola nova norma que lles prohibe beber cervexa no traballo.

Redacción - 16:30 11/04/2010

Centos de empregados da compañía cervexeira danesa Carlsberg puxéronse en folga para protestar pola decisión da empresa de prohibir o consumo de cervexa durante o traballo. O paro comezou o pasado día 1 de abril, cando a directiva introduciu a nova norma.

Segundo explicou Jens Bekke, portavoz da empresa, "os traballadores sempre tiveron á súa disposición auga, cervexa e refrescos, mais a partir de agora a cervexa só estará dispoñíbel no comedor da empresa".

Porén, os transportistas fican excluídos e poderán seguir a beber tres cervexas ao día. Ao respecto, Carlsberg informou de que os camións dispoñen dun dispositivo que detecta o consumo de alcol, polo que os condutores non as poden inxerir mentres están conducindo.

A repartición de cervexa no país, afectada

Uns 800 operarios da fábrica, apoiados por outros sectores, uníronse á folga e 250 non volveron ir traballar desde que se convocou. O asunto transcendeu tanto que mesmo a Confederación da Industria Danesa e o sindicato 3F tiveron que intervir para buscar unha solución.

A protesta tamén afectou á repartición de cervexa no país. Polo momento, paralizáronse os envíos de mercancía desde Copenhaguen e rexistráronse demoras no resto do país. Carlsberg, o cuarto maior fabricante de cervexa do mundo, espera porén que a folga non teña consecuencias financeiras graves.


3.5/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: