Vieiros

Vieiros de meu Perfil


Edición xeral

RSS de Edición xeral
Violencia étnica

Asasinatos e violacións de mulleres e crianzas en Quirguicistán

Chega a Usbequistán o primeiro avión con axuda humanitaria para os 75 mil refuxiados, mentres moitos outros se amorean na fronteira, xa pechada.

Redacción - 11:00 16/06/2010
A fronteira usbeca está pechada

A fronteira usbeca está pechada

"O nivel de violencia en Quirguicistán é alarmante", alertaba este martes Nacións Unidas, que constatou que as violacións e os asasinatos contra crianzas e mulleres se suceden no sur do país dentro dos enfrontamentos étnicos entre quirguices e usbecos que se desataron o pasado venres. 

Oficialmente, a cifra de mortos sitúase en 176, aínda que as propias autoridades admiten que podería ser varias veces maior. Ademais, o Alto Comisionado da ONU para os Refuxiados (UNHCR, en inglés) informou de que hai 200 mil persoas desprazadas dentro do país, e outras 75 mil refuxiáronse en Usbequistán.

As fronteiras do país veciño pecháronse o luns agás para aqueles feridos ou con necesidades especiais, argumentado carecer de recursos para xestionar o éxodo. Á última hora deste martes, informa Al Jazeera, reabriu tres pasos para deixar pasar máis de 60 persoas feridas.

O primeiro avión cargado con 40 toneladas de axuda humanitaria internacional chegou esta cuarta feira a Usbequistán, mais ás portas amoréanse os que foxen dos disturbios. Unicef asegura que o 90% dos refuxiados son crianzas, mulleres e anciáns, que tamén sofren a violencia física e psicolóxica nas súas carnes.

A axencia de noticias AFP relata o caso de tres irmás usbecas de entre 16 e 23 anos, violadas durante varias horas por unha turma de quirguices, segundo o testemuño de Mukaddas Majidova, doutor usbeco en Khoja-Obod. Human Rights Watch afirmou que aínda non tiveran a posibilidade de comprobar a veracidade desas acusacións.


4.38/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: