Vieiros

Vieiros de meu Perfil


Edición xeral

RSS de Edición xeral
Eleccións, este domingo

Dous conservadores aspiran á Presidencia de Polonia

Lech Kaczynski, o euroescéptico irmán xemelgo do finado Jaroslaw, e Bronislaw Komorowski, máis aberto á UE, optan ao posto. O voto da esquerda, chave.

Redacción - 11:15 04/07/2010
Imaxes de ambos os dous candidatos

Imaxes de ambos os dous candidatos

Tres meses após a morte do presidente Lech Kaczynski comezou este domingo a segunda volta para a elección do seu sucesor. Máis de 30 millóns de polacos están habilitados para elixir entre o irmán xemelgo do falecido mandatario, Jaroslaw Kaczynski, e o xefe do Parlamento, Bronislaw Komorowski.

O líder de Lei e Xustiza (PIS), o conservador Kaczynski, de 61 anos, quere un Estado nacional máis forte e que Polonia faga parte do G20. Komorowski, de 58 anos, é candidato do partido gobernamental liberal conservador Plataforma Cidadá (PO) do primeiro ministro Donald Tusk. En política exterior, Komorowski inclínase cara á UE. Desde a morte de Lech Kaczynski desempeña interinamente as funcións de xefe de Estado.

Na primeira volta, hai dúas semanas, Komorowski gañou cun 41,5% dos votos e Kaczynski ficou a cinco puntos. Segundo as enquisas, o primeiro tamén é favorito nesta segunda volta, aínda que o seu rival se recuperou nos últimos días. A previsión é que o resultado da votación, que non se coñecerá até este luns pola tarde, sexa moi igualado.

E a esquerda?
Gregorz Napieraski, líder da Alianza da Esquerda Democrática (SLD), converteuse nun actor esencial nestes comicios. O 14% obtido na primeira volta converteuno na sorpresa e na posíbel chave de cara á elección do presidente.

Cauteloso, Napieraski non apoiou explicitamente ningunha das dúas principais candidaturas. Con todo, outros políticos da esquerda apoiaron explicitamente a Komorowski en contra do euroescéptico e conservador Kaczynski, que no pasado deixou claro o seu desdén ao pasado comunista do país.

"Komorowski conta con menos críticos entre a esquerda que o seu rival, e iso é unha vantaxe, mais debe convencer a xente de non ficar na casa", indicou o analista Jacek Kucharczyk, do grupo de estudos do Instituto de Asuntos Públicos a axencias internacionais.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: