Vieiros

Na convicción de que unificar posicións e afondar na integración rexional é o factor clave para a solución de moitos dos problemas no continente sudamericano, os líderes de Brasil, Venezuela e Arxentina acordaron varias xuntanzas sectoriais de ministros para as próximas semanas cara o deseño de estratexias comúns. A primeira reunión en Brasilia estaría centrada en temas sociais e loita contra a pobreza, a continuación, en Bos Aires o debate será sobre asuntos económicos, e finalmente, en Caracas tratarán de xeito específico a colaboración no eido enerxético, que levaría á creación dunha petroleira rexional, Petrosur. Asimesmo, consensuarán posicións fronte a organismos internacionais, moi especialmente diante do FMI.