Vieiros

Espoesía pretende promover a poesía en todos os eidos, fomentar o seu ensino e coñecemento, reivindicala como xénero de expresión e crear redes de intercambio entre as diferentes linguas do Estado. Unha das primeiras actividades que vai organizar a rede poética será o festival de poesía de Madrid, do 18 ao 24 de xuño, que contará con importante presenza galega e catalá. Neste tipo de encontros aspírase a impulsar o xénero dende a oralidade.

A rede ten entre os seus obxectivos romper as barreiras dun xénero considerado minoritario, para que chegue a acadar un espazo de liberdade. De feito, o nome Espoesía fai referencia ao espazo e ao xénero lírico e é común ás linguas romances do Estado.

Outra das iniciativas xurdidas dende Espoesía será a posta en marcha de casas dos poetas por todo o territorio estatal, para que os creadores conten nun lugar onde escribir. Ademais, os participantes na iniciativa organizarán un directorio internacional de actividades poéticas con representantes doutros países estabelecidos en Madrid.

Finalmente, Galiza foi escollida como lugar de presentación da rede, que se deu a coñecer o xoves no Consello da Cultura. No acto participaron o poeta e editor Miguel Anxo Fernán-Vello; a directora do festival internacional de poesía de Moncayo (Zaragoza), Trinidad Ruiz Marcellán; o presidente da aula de poesía de Barcelona, Jordi Villaronga; o presidente do Pen Club de España, Basilio Rodríguez Cañada, e o promotor internacional de actividades poéticas Germain Droogenbroodt, ademais do director xeral de Creación e Difusión Cultural, Luís Bará, para simbolizar o apoio que Cultura lle prestará a esta iniciativa.