Vieiros

Por vez primeira desde 1878 o Quebec estará gobernado por unha formación política que non acadase maioría absoluta na cámara. A outra clave nestes comicios é a caída dos independentistas do Partido Quebequés, PQ, que nunca caeran por baixo do 30% do total do voto.

Os resultados provisionais indican que o Partido Liberal do Quebec, PLQ, perde 24 escanos e queda en 48 deputados. O resto de representantes, e até o total de 125 da Asemblea Nacional, repártese entre o PQ, con 36 deputados, e Acción Democrática do Quebec, ADQ, con 41 asentos.

Xa que logo, o máis relevante é ese ascenso do ADQ, que chimpa desde só 5 deputados a ser a segunda forza en representación, abrindo fenda no tradicional bipartidismo do escenario político local. O novo reparto de poder frea de momento a aspiración do Partido Quebequés cara a un novo referendo sobre a independencia. Con todo, o líder do partido, André Boisclair, é optimista respecto a esa arela. Nas súas primeiras declaracións despois de coñecérense os resultados, o líder dos independentistas insistiu en que alén da conxuntura especial destes comicios "hai millóns de quebequeses que queren que a nosa nación sexa un país de seu".