Vieiros

"Ola tontos" é a mensaxe que algunha persoa descoñecida deixou escrita con pintura amarela no interior do dolmen de Axeitos, unha das principais mostras da arte megalítica do país. O monumento, situado na parroquia de Oleiros, en Ribeira, leva varias semanas afectado por esa agresión. Segundo informa a edición barbancesa de La Voz de Galicia, cando menos até este luns ninguén fixo nada por restabelecelo ao seu estado orixinal.

Este tipo de atentados contra o patrimonio cultural son delitos penais. Dáse a circunstancia de que este xoves se reunirán na Coruña representantes da delegación provincial da Consellaría de Cultura, dos corpos de seguridade e mais o fiscal para estudar o protocolo de actuación cando se produzan delitos deste tipo.