Vieiros

O Karpin Galicia realizou o seu último adestramento de fondo, antes da 'Vuelta a España 2007', nesta semana por Vigo e comarca e para participar nel foron convidados varios ciclistas amadores -das categorías Elite e Sub-23- de clubes galegos.

O director deportivo do Karpin Galicia, Álvaro Pino, e mailo manager do equipo, Rodrigo Costas, fixeron varias rondas polo adestramento, observando as capacidades dos novos corredores galegos.

O técnico anunciou, ao terminar o adestramento, que será no mes de setembro cando dé a coñecer os nomes dos corredores amadores que van pedalear, dende aquela, no equipo profesional galego, aínda que dixo que é probábel que reserve algunha outra praza para outubro ou novembro.

Algúns dos ciclistas correrán para o Karpin Galicia en 2008
Os corredores amadores foron emprazados polo Karpin para un outro encontro e adestramento, mediado o mes de xullo, onde pode que mude a selección que teña xa matinada Álvaro Pino.

O director deportivo do Karpin Galicia tamén se dirixiu, ao terminar o último adestramento, aos corredores máis vellos convocados, para aclararlles que "a idade non é en si mesma un obstáculo para pasar. Para min son máis importantes a ilusión e as ganas de ser ciclistas que demostredes".