Vieiros

Esta marcha percorrerá a primeira etapa da 'Vuelta a España' un día antes de que o fagan os profesionais, e nela poderán participar un máximo de 500 cicloturistas maiores de 16 anos.

O xerente de Galicia Calidade, Xabier Ignacio Louzao, foi o encargado de presentar na quinta feira a Marcha Ciclista Volta a España-Galicia Calidade; organizada pola Fundación Ciclismo Galego e patrocinada por Galicia Calidade, que partirá, o 31 de agosto de Vigo. A proba, que pertence ao Circuíto de Marchas cicloturistas de gran fondo, vai servir para cumprir o soño de moitos afeccionados á bicicleta, que se van poder poñer, aínda que só sexa por un día, á altura dos profesionais do ciclismo, ao lles permitir percorrer a primeira etapa da 'Vuelta a España' un día antes de comece, contando cunha infraestrutura profesional.

Axudando na xornada estarán varios ilustres ex ciclistas como Abraham Olano, Fernando Escartín, Miguel Ángel Iglesias, Santi Blanco, Álvaro Pino, Blanco Villar ou José Ángel Vidal. Algúns pode que tamén se animen a realizar o percorrido en bicicleta.

Todos os participantes levarán para a casa un paquete agasallo, cunha bolsa, un diploma acreditativo da participación, unha camisola e un convite á gala de presentación dos equipos participantes na Vuelta, que se celebrará no mesmo día, á tardiña.

A etapa que se realizará nesta marcha conta con 122,8 quilómetros e percorre diversas localidades da provincia de Pontevedra, comezando en Vigo e pasando por Redondela, Arcade, Paredes, Pontevedra, Alto de Vilachán, Pontecaldelas, Soutomaior, Pazos de Borbén, Ponteareas, Porriño e Alto de San Cosme, para rematar novamente en Vigo, no paseo de Samil.