Vieiros

"A economía arxentina mostra unhas cifras envexables de crecemento continuado, acompañado por un marco positivo de equilibrios macroeconómicos básicos, con superávits primarios descoñecidos para a Arxentina das últimas décadas". Ese foi o balance que trazou a vicepresidenta primeira do goberno español, María Teresa Fernández de la Vega, onte na cidade de Bos Aires. Á saida dun encontro co presidente arxentino, Néstor Kircher, a mandataria española loubou "as cifras envidiables de crecemento" que mostra a economía arxentina e salientou o compromiso co país que se reflicte nos 43 mil millóns de euros de investimento español.

A funcionaria do goberno de José Luís Rodríguez Zapatero comezou o día de traballo en Bos Aires cun almorzo organizado pola Cámara Española de Comercio, do que participaron executivos de firmas de capitais hispanos con intereses no país. Logo diso, mantivo unha reunión co presidente Kirchner na casa de Goberno.

Á saida e en conferencia de prensa, Fernández de la Vega loubou a situación arxentina e de contado destacou que ese crecemento dáse "con redución do paro e mellora doutros indicadores sociais como a pobreza".

A vicepresidenta do goberno español opinou ademais sobre un asunto polémico e delicado da actualidade arxentina: "É certo que como en todo proceso de cambio, especialmente cando o desenvolvemento é tan acelerado como experimenta a Arxentina, prodúcense desajustes puntuales como son as tensións inflacionarias ou a dificultade para acomodar a suficiencia energética ao forte aumento da demanda".

Segundo a vicepresidenta, "os españois coñecemos ben algunhas desas dificultades; e entre os nosos maiores acertos, ao facelles fronte, está construír e saber manter un modelo de concertación social laboral, un marco acordado entre goberno, sindicatos e patronal".

Ao almorzo de traballo realizado no hotel Alvear, asistiron executivos de Repsol YPF, BBVA Banco Francés, Santander Río, Gas Natural Ban, Edesur, NH Hoteis, Telefónica, Constructora San José, Bodegas Fournier, entre outras. Posteriormente, na sede diplomática de España na Arxentina, Fernández de la Vega, quen chegou o martes á noite a Bos Aires na última etapa dunha visita por seis países da rexión, informou sobre os detalles da reunión co presidente Kirchner.

"Puidemos constatar a extraordinaria relación que atravesan ambos países", dixo a vicepresidenta de España, recordando que as empresas españolas investiron 43 mil millóns de euros na Arxentina, que "nos converteron en líder mundial xunto a Estados Unidos".