Vieiros

"É ineptitude ou é connivencia?". Tal é o razoamento que fan desde a Asociación pola Defensa da Ría, APDR, ao fío da actualidade sobre as factorías de Lourizán. Pregúntanse os veciños "que razóns hai para incumprir o acordo programático de sacar o complexo Ence-Elnosa da súa actual localización?". Lembran ademais que hai máis de vinte meses que o colectivo lle pediu a primeira entrevista ao conselleiro de Medio Ambiente e de momento non hai cita para esa xuntanza.

"Están poñendo en perigo o necesario proceso de saneamento e recuperación da ría de Pontevedra", quéixanse desde a APDR, advertindo de que a Xunta non está tratando "co rigor necesario" o traslado das fábricas. "Cada día son máis as evidencias que fan pensar que o actual Goberno non está disposto a actuar decididamente, para adiantar a data de saída do complexo da nosa ría", láianse.

A asociación repróchalle á Xunta a serie de declaracións "para xustificaren a súa suposta preocupación polo tema", ao tempo que na opinión do colectivo o executivo trataría de evitar o traslado antes de 2018. "Fan pensar en que o goberno galego está disposto a dilatar indefinidamente esta transcendente decisión", advirten. Por iso, pregúntanse se "esta actitude da Xunta de Galicia resposta á súa propia ineptitude ou se polo contrario se trata dun caso de aberta complicidade coa empresa pasteira". "En calquera dos casos a inoperatividade do Goberno resulta máis que evidente", denuncian.

No Canal Verde poden ler o comunicado completo da asociación: A APDR denuncia a absoluta inoperatividade da xunta no tema Ence