Vieiros

Vieiros de meu Perfil


Edición xeral

RSS de Edición xeral
Defende o "rigor" do informe

O conselleiro maior do Consello de Contas ve "responsabilidades" do goberno Fraga co Gaiás

Antonio López recoñece que as irregularidades detectadas no proxecto da Cidade da Cultura poden derivar en sancións para membros do anterior executivo.

Redacción - 09:30 16/08/2007

O conselleiro maior do Consello de Contas, Antonio López, que tomará posesión do cargo á volta das vacacións, referiuse este mércores nos micrófonos da Cadena Ser á denuncia presentada pola CIG na Fiscalía sobre a actuación do executivo anterior no que respecta á Cidade da Cultura. López non quixo afondar no asunto, pero si sinalou que é clara a detección de diferentes "niveis de incumprimento" e que das simples irregularidades pode falarse de aspectos que derivarían na necesidade de que membros do Goberno anterior deban asumir "responsabilidades" polas súas actuacións.

Por outra parte, López destacou que a "seriedade e rigor" do informe de 2004 do organismo estea dando que falar e recoñeceu que a vontade da institución é conseguir que estes informes "cheguen antes". "Non é doado, dados os prazos que teñen as institucións para renderen contas e os do Consello para estudalas", laiouse.

Explicou nese sentido que unha institución dispón de até sete ou dez meses para enviar a información requirida e a continuación, o Consello de Contas debe afrontar un complexo proceso de análise, elaboración de borradores e avaliación definitiva antes de que proceder á súa publicación. Por isto, considerou normal que pasen "até dous anos desde que finaliza un exercicio até que se coñece o informe". Nesa liña, avisou de que os informes "nunca poderán ser inmediatos" e chamou a evitar pensar que, como desta volta cun cambio de goberno polo medio, se "deixa pasar" o tempo.

Ademais, insistiu en que o labor do Consello de Contas é adicional aos instrumentos de control e fiscalización que xa se aplican no día a día. Salientou así que isto debe "transmitir a sensación de que si hai un alto nivel no control dos fondos públicos".


5/5 (6 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: