Vieiros

"Preguntáronme se é que virei tolo, que me sobran os cartos ou se pretendo arruinarme e arruinar de paso o meu editor. Non é o caso", explica Alberto Vázquez-Figueroa no seu blog. A continuación reflexiona sobre os motivos polos que concluíu que con este sistema poderá chegar a novas audiencias sen ver afectados os seus xa elevados ingresos.

Queixas pola presión fiscal sobre os autores
Fai balance Vázquez-Figueroa da venda nesta altura da súa vida dunha cifra acumulada de arredor de 25 millóns de libros, pero láiase de que "de todos os cartos que gañei a metade levounos Facenda". Ao fío, compara a situación co Reino Unido, onde segundo explica "os escritores non pagan taxas polo froito do seu traballo". "Iso significa que un escritor inglés conta co dobre de medios económicos ca min para viaxar ou investigar á hora de enfrontar un novo traballo", quéixase.

O último: novela sobre Iraq
De paso, o escritor conta na bitácora sobre a súa nova obra, Por mil millóns de dólares (.pdf), descargábel de balde, onde conta das "escuras maquinacións das grandes compañías americanas que inventaron a existencia de armas de destrución masiva coa fin de iniciar unha guerra que custou casen medio millón de mortos e nunca poderá gañarse pero que produce miles de millóns en beneficios".