Vieiros

A Fundación Xosé Neira Vilas convoca a cuarta edición do Premio Arume de poesía infantil. O certame, de carácter bienal, está dotado cun primeiro premio de 1.500 euros máis a publicación en Ediciós do Castro. Até agora, as convocatorias foron un éxito, con máis de medio cento de obras presentadas.

Coa convocatoria, a fundación pretende fomentar a creación dunha poesía infantil, pensada para ser lida e recitada en galego para a poboación en idade escolar como un reforzo dos contidos educativos. A iniciativa está canalizada polos especialistas da fundación, coordinados por Anisia Miranda e Xosé Neira Vilas. O prazo de recepción de orixinais remata o 31 de outubro e a entrega terá lugar no mes de Nadal.

A presentación do premio, no Club Internacional de Prensa, serviu tamén para dar a coñecer o funcionamento da fundación. O centro cultural, situado na Casa do Romano, en Gres (Vila de Cruces), está situado a distancia dos núcleos urbanos, habituais xeradores e aglutinadores de cultura, e fomenta o aprecio ao propio e á relevancia da aldea.

Constitúe tamén un referente para a Galiza na emigración. Neira Vilas decidiu volver á terra para facer un labor coa xente nova dos lugares de onde el naceu, abrindo unha biblioteca e organizando actos coa axuda da fundación na que colaboran, entre outros, a súa dona, Anisia Miranda.