Vieiros

Vieiros de meu Perfil


Edición xeral

RSS de Edición xeral
Os inspectores debían entrar este xoves

Ábrenlle expediente á familia Franco por botarlle o fecho ao Pazo de Meirás

Até 60 mil euros de sanción poderían afrontar os herdeiros de Francisco Franco despois de bloquear o acceso dos técnicos.

Redacción - 15:30 30/08/2007
Pazo de Meirás

Pazo de Meirás

Para a mañá deste xoves estaba previsto que os técnicos accedesen ao Pazo de Meirás. Así llo comunicara xa a Dirección Xeral de Patrimonio á familia Franco. Tratábase dun paso imprescindíbel para a elaboración do informe a partir do cal se tramitará a declaración do Pazo como Ben de Interese Cultural.

Porén, o acceso foille impedido aos técnicos e un avogado en representación da familia argumentou o "dereito á inviolabilidade do domicilio" e o contencioso administrativo interposto no Tribunal Superior de Xustiza de Galicia como escusas para a negativa.

Con todo, a decisión dos herdeiros de Franco de non consentir o paso dos responsábeis da Consellaría de Cultura, implicará a apertura dun expediente sancionador contra eles. Así, poderían enfrontar multas de até 60 mil euros por negar a entrada a un inmóbel patrimonial catalogado.

Pola súa banda, Cultura recorrerá á vía xudicial para poder exercer o seu dereito á inspección do pazo. Nos vindeiros días solicitará esa autorización no xulgado contencioso-administrativo.

O proceso xudicial estende a loita cidadá
Hai poucas semanas, o pleno do Concello de Sada aprobou unha declaración apoiando esa declaración de Ben de Interese Cultural, que a Xunta proxecta desde hai meses. De ir adiante, os herdeiros de Franco quedarían obrigados a abrir as portas do Pazo de Meirás durante catro días cada mes, permitindo as visitas.

Por outra parte, a loita veciñal vén de moito máis atrás, e colectivos como a Comisión para a Recuperación da Memoria Histórica, téñense manifestado diante do Pazo reclamándolle á familia do ditador que llo "devolva" aos cidadáns.


4,68/5 (19 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: