Vieiros

As galescolas mergúllanse na rede e contan a súa vida diaria a través dos seus blogs. As bitácoras son un servizo máis dos que se inclúen no portal Galescolas.net, onde tamén se inclúen novas e todo tipo de ferramentas de interese para as familias e o profesorado.

En principio, seleccionáronse catro galescolas que dependen directamente de Vicepresidencia para participar na experiencia. Son unha de cada provincia: Santa María de Oza, na Coruña; Nosa Señora da Purificación, de Foz; Antela, de Ourense, e Caeiro, en Vigo. As bitácoras abríronse a finais do curso pasado, coa intención de que a iniciativa se vaia implantando no resto dos centros do país.

Explican dende Vicepresidencia que esta ferramenta, que serve para compartir experiencias e facer partícipe a comunidade educativa, é unha ferramenta máis das que se inclúen no portal. As bitácoras permítenlle a cada centro facer fincapé nas súas actividades. Así, nas entradas xa publicadas podemos coñecer excursións e concertos organizados polos centros.
Ademais dos blogs dos centros, tamén están abertos ao público blogs persoais das familias e do profesorado.

Por outra banda, Galescolas.net tamén ofrece outro tipo de servizos: recursos educativos, un calendario de actividades e diversa documentación nutricional. Así mesmo, os usuarios rexistrados no portal, que dispoñen de cadansúa clave privada, poden manter un contacto directo coas crianzas e coñecer a súa evolución escolar, os horarios e o menú, entre outros detalles.