Vieiros

Unha escolma de máis de sesenta traballos audiovisuais poderase ver en Ponteareas na primeira edición do Mívico (Mostra Internacional de Videocreación do Condado). Durante a pasada fin de semana xa se desenvolveu unha fase previa itinerante pola comarca, en Nigrán, Mondariz Balneario e Ponteareas.

No festival poderanse ver traballos de todo o mundo: Galiza, Portugal, Cataluña, Euskadi, os Estados Unidos, Noruega e o Reino Unido, entre outros. Durante tres días, proxectaranse curtametraxes, videocreacións e documentais, como How soon is now? e Ainda há pastores?, dentro da sección Zúmballe.

As actividades audiovisuais estarán acompañadas de música, cos picadiscos Pintxo e Birra e dos grupos portugueses Smartini e Musgo. A entrega de premios será o sábado ás dez e media da noite. O festival conta cun blog onde tamén se pode consultar o programa completo.