Vieiros

Isaac é un coprodución entre EAF Producións e a TVG. En 55 minutos, aborda a vida e obra de Isaac Díaz Pardo, fundador, promotor e primeiro traballador do Laboratorio de Formas, de Cerámicas do Castro, de Sargadelos, de Ediciós do Castro e do Instituto Galego da Información.

Dirixido por Xosé Abad, con guión de Carlos Vázquez, o documental recorre a elementos biográficos, pero afonda tamén no pensamento, a opinión e os sentimentos de Díaz Pardo sobre o seu tempo e o seu país. Con 87 anos e óptima saúde intelectual, Díaz Pardo ofrece a súa opinión, sempre comprometida e libertaria.

No documental interveñen persoeiros como o presidente da Xunta, Emilio Pérez Touriño, Xesús Alonso Montero, catedrático da USC e militante do PC, Avelino Pousa Antelo, presidente da Fundación Castelao, os escritores Xabier Seoane e Manuel Rivas, os músicos Benedicto García e Xurxo Souto, o editor Sabino Torres ou o historiador Ramón Villares.

O equipo técnico

Á dirección de fotografía de Antonio Vales e a montaxe de Sandra Sánchez e Pablo Golugoff, súmanse o traballo da documentalista Sandra García, o de Héctor Diéguez e Helvia Lema na produción, Óskar López no son, Diego Jiménez Pumares no deseño gráfico, e Beatriz Paz na maquillaxe.

Destaca a coidadísima banda sonora, con temas de Milladoiro, Carlos Gardel ou o mítico 'Can de palleiro' de Benedicto e Bibiano, ademais dunha achega de Dios ke te crew, 'As cousas cambian'.