Vieiros

Certo é que, na súa maioría, os representantes do noso país na Cámara alta do parlamento español non se destacan por ter unha intensa actividade parlamentaria, mais o senador electo pola provincia de Lugo e ex presidente da Deputación de Lugo, Francisco Cacharro Pardo, gañaría unha medalla de ouro de celebrarse unha competición deportiva. En realidade gañaría todos os premios.

Durante os catro anos desta lexislatura que xa remata, Cacharro Pardo realizou unha única intervención parlamentaria (unha pregunta con petición de resposta por escrito). O 10 de febreiro de 2005 rexistrouna no Senado, doce días despois foi admitida a trámite e o 6 de abril foi contestada.

Dado que Cacharro concentrou o traballo de catro anos nunha soa intervención/pregunta, o tema tratado debería ser de vital importancia: "Valoración do goberno en relación coas personalidades invitadas o día 12 de xaneiro de 2005 aos actos de entrega ao Ministerio de Fomento do Premio Internacional Puente de Alcántara", polas obras realizadas na A-6 en varios tramos da provincia de Lugo. Medalla de ouro á 'calidade' no traballo.

Magnitude do seu labor como senador
Mais, para ter unha máis adecuada perspectiva do 'exhaustivo' traballo do de Guarromán (Jaén, Andalucía) -un dos catro representantes de todos os lucenses en Madrid-, cómpre salientar as 166 intervencións do seu compañeiro de partido, o popular Cesar Aja, ou as 590 do socialista Luís Anxo Lage, ambos os dous senadores tamén por Lugo.

Por non falar doutros casos. Lonxe están, por exemplo, as representantes da Coruña e de Ourense, Mª Belén do Campo e Mª Mercedes Gallego, ambas tamén do PP, con 1.923 e 3.452 intervencións parlamentarias cada unha, entre preguntas, interpelacións e solicitudes.

Este dato confirma un dos mitos máis estendidos no que se refire a capacidade de traballo de homes e mulleres. As dúas únicas senadoras con que conta Galiza, dos 19 representantes en Madrid (catro por provincia e tres por designación autonómica), son as que máis intervencións realizaron nesta lexislatura.

En terceiro lugar aparece o ex alcalde de Ourense, Manuel Cabezas (senador por Galiza, en substitución de Corina Porro), que realizou 1.726, ou o que é o mesmo, 1.726 intervencións máis ca Francisco Cacharro Pardo, medalla de ouro á 'cantidade'.

Xa pola cola, dispútanlle o posto ao ex presidente da deputación lucense -aínda que con moi poucas opcións de vitoria- Evaristo Nogueira, senador do PP electo pola Coruña, con 13 intervencións (oito preguntas orais e cinco por escrito) en catro anos. No terceiro posto sitúanse, empatados, o alcalde socialista da Coruña, Francisco Xavier Losada, e o senador por Lugo do Partido Popular Fernando Rodríguez con 15 intervencións cada un.

Senadores por designación autonómica
Outro dato. Ademais de Manuel Cabezas, os outros dous senadores por Galiza, Francisco Jorquera (BNG, en substitución de Anxo Quintana, o único desta formación) e Manuel Fraga Iribarne (PP), realizaron 74 e 324 intervencións parlamentarias cada un, respectivamente.

O primeiro repartidas en dúas interpelacións, 27 preguntas orais, 42 con requisito de resposta por escrito e 3 solicitudes, namentres que no caso do segundo -que non baixa o ritmo- todas foron reclamacións de resposta por escrito.