Vieiros

O documental recolle todo o acontecido no VIII Encontro de Embarcacións Tradicionais, que se desenvolveu en Ferrol este verán, mais tamén hai nel o traballo de centos de anos das persoas do mar e da xente de agora que traballa pola recuperación do patrimonio marítimo e fluvial galego.

O documental Un mar de velas será estreado este sábado 10 na Galega, e, segundo Pemón Bouzas, director do filme, o filme "é o produto das inquedanzas tanto da Dirección Xeral para o Deporte coma da TVG sobre a defensa e protección do patrimonio marítimo e fluvial galego".

Ademais de dedicarlle un tempo ao encontro de Ferrol, o filme fai un percorrido polas distintas asociacións, fala cos mariñeiros, cos historiadores... para coñecer a toda a xente que leva anos traballando para conseguir que o patrimonio marítimo e fluvial galego sexa posto en valor.

A presentación do filme
No acto de presentación estiveron presentes a directora xeral para o Deporte, Marta Souto, o director de programas da Galega, Eduardo Galán, o presidente da Federación Galega pola Cultura Marítima e Fluvial (FGCMF), Fernando Piñeiro, e o director do documental, Pemón Bouzas.

Marta Souto felicitou á Galega e aos responsábeis do documental polo bo traballo realizado e lembrou o convenio de colaboración asinado coa FGCMF, a través do proxecto Nabeira, que terá o seu momento de gloria coa presenza de Galiza como invitada de honra na Feira Marítima Internacional de Brest (Bretaña), en xullo do ano que vén.

Marta Souto asegurou, ao terminar a conferencia de prensa, que "Galiza vai estar representada alí coa nosa cultura, a nosa música, a nosa gastronomía, as nosas embarcacións tradicionais... É un xeito de proxección internacional da cultura marítimo e fluvial galega".