Vieiros

Vieiros de meu Perfil


Edición xeral

RSS de Edición xeral
A estrea de 'Liste, pronunciado Líster'

Un neno de aldea que chegou a "xeneral de catro exércitos"

O Teatro Principal de Compostela acolle este venres ás 21:00 a estrea do documental de Margarita Ledo; a historia de Enrique Líster a través da persoal ollada da cineasta.

Redacción - 09:00 09/11/2007

Un neno de aldea que chegou a xeneral de catro exércitos (o republicano, o ruso, o polaco e o iugoslavo), que naceu co nome de Xesús Liste e morreu co de Enrique Líster, emigrante perpetuo.

Xesús Liste -de pai canteiro e de nai campesiña- emigra a Cuba no 1918, con once anos, e a súa historia vai parella coa do século XX: no 27 entra no Partido Comunista Cubano, no intre da súa fundación, e no 28 regresa a Galiza e organiza o Sindicato de Oficios Varios da súa comarca, Teo. O cárcere e unha dura condea pendente aconsellan que saia cara Moscú.

Cando volve, no 35, responsabilízase do traballo antimilitarista nos cuarteis de Madrid. Entón sucédense as guerras: a civil, e a súa loita pola República. A mundial, e a súa intervención como xeneral nos exércitos do Leste. A Fría, cando marcha para Cuba e forma parte do Consello da Paz.

Como indica Margarita Ledo, é unha honra presentar este filme nunha cidade onde el entrou nas células comunistas, onde a xente veu andando dende Calo, para apoialo, cando o levaron preso, unha cidade que aínda o ten presente no seu imaxinario.

Incide tamén en que Cineuropa é o lugar propio para o cinema "propio, europeo, autoral", como neste caso.

Conta Ledo como viviu durante tres anos a vida de Líster, mergullándose de cheo nos moitos e diversos "Lísters latentes" que coexistían. O documental vai alén da reportaxe biográfica, precisamente por retratar esta personalidade complexa, non liñal: "cando empecei a explorar este retrato, interesoume moito a creba que vivía Europa, e como Líster mantiña invariábel o seu modo de pensar".

O material fílmico abrangue dende o imaxinario que arrodea ao personaxe, os filmes de familia, os lugares, os arquivos oficiais.. E mesmo creación, xa que se introduce unha parte dramatizada coa colaboración de Mónica Camaño, Zé Paredes, Anxo Laborda e Margarita Fernández. Para esta parte contouse coa dirección artística de Ricard Salvat e coa moi especial ollada cinematográfica de Markus Döhne e Bernardo Tejeda.

O proceso de creación
Eles tres estiveron tamén presentes na conferencia de prensa: Salvat falou, pola súa parte, do seu coñecemento persoal de Líster a través do Consello Mundial da Paz: "cando viaxas con alguén acabas por coñecer o seu lado máis humano. Líster era un home con moito respecto pola cultura, que creaba un grupo de fieis alá onde ía".

Döhne, pola súa parte, salientou que o seu traballo é "sobre a alma da fotografía, son escultor aínda que traballe con fotografía". José Luis Losa, director de Cineuropa, afirmou o risco asumido pola cineasta "á hora de atreverse con Líster", e subliñou a relevancia deste personaxe a nivel internacional. E Bernardo tejeda, pola súa parte, incidiu na "dimensión caleidoscópica" do filme, en que diversos elementos configuran a historia. Diversos Líster, unha historia parella á dun século convulso, que poderemos coñecer este venres.


4.1/5 (10 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Líster con Ernest Hemingway. Fotografía que aparece no filme
Líster con Ernest Hemingway. Fotografía que aparece no filme
Falando pola radio
Falando pola radio
Unha imaxe da autora da filme, tamén escritora e profesora catedrática de Comunicación Audiovisual da USC
Unha imaxe da autora da filme, tamén escritora e profesora catedrática de Comunicación Audiovisual da USC