Vieiros

A pesar de facer xa un chisco de frío, e estaren os macrofestivais limitados ao verán, en Galiza as cousas van ao revés, e esta fin de semana veñen algunhas das bandas do melloriño do panorama musical estatal e galego. Mais tamén hai outros concertos coas mellores voces da lusofonía, ou o de Mercedes Peón... todo a seguir.

Macrofestival hard core, punk rock na Estrada
Na Estrada esta sexta feira comeza o II Festival Inferno Rock, que terminará o sábado de madrugada. Na sexta toca Rosendo con Gatillazo (o grupo de Evaristo e algúns dos de La Polla Records), os madrileños Boikot e os galegos Nao e Knell. O sábado están os perseguidos Sociedad Alkoholika, os madrileños harcoretas de Habeas Corpus, Koma e Ktulu. Todos os concertos son na Sala Lennom e hai zona de campamento (cuberta!), e un servizo de buses de balde, que levará á xente cara a sala. Ámbolos dous concertos comezan ás 20:30 horas.

Sons portugueses en Compostela e Vigo
A V Mostra Portuguesa, organizada pola Fundación Barrié, trae este ano a Galiza un pedaciño da música lusa. A sexta feira están no Auditorio de Galicia, en Compostela, tres dos solistas máis internacionais do fado: Mariza, Camané e Carlos do Carmo.

O domingo Rão Kyao vai estar no Cine-Teatro Salesianos de Vigo. O lisboeta cumpre máis de trinta anos sobre os escenarios, acompañado da súa frauta e a súa mestura de sons, alén dos portugueses, os das colonias: o celme da tradición da música árabe, india, africana e brasileira. O concerto comeza ás 20:00 horas.

Sons da Diversidade e lembranzas da marea branca de voluntarios
De balde é o concerto (organizado polo Voluntariado Galego para conmemorar os 5 anos de voluntariado do Prestige) que reúne, a sexta feira no Multiusos Fontes do Sar de Compostela, aos funkis galegos, os Loretta Martin, co músico xamaicano Horace Andy e os franceses Dub Asante Band. O concerto comeza ás 21:00, e hai buses gratis dende as 19:30 horas.

Na mesma cidade, o mesmo día e ás mesmas horas, Mercedes Peón presenta no Auditorio de Galicia o seu último traballo, Sihá, ademais de facer un percorrido antolóxico polos mellores temas que integran a súa carreira profesional. O concerto enmárcase no ciclo Sons da Diversidade, que organiza a Consellaría de Cultura de Santiago de Compostela.

Skatalíticos en Vigo
O mellor do ska norteamericano está de xira e chega a Vigo: son The Toasters, que tocan este venres na Sala A Iguana. Os pioneiros do ska nos EUA estarán acompañados dos cataláns Deskarats (que cumpren a máxima de calquera grupo do estilo, poñer un "ska" no nome), e que veñen a presentar o seu último disco, DSK-2006, que está producido, curiosamente, polo líder dos Toasters, Rob Hingley, Bucket.

Isto non é todo no país onde, dando unha patada a unha pedra saen douscentos grupos de música; hai moitísimos concertos, pero isto é só unha mostra do que podedes ver esta fin de semana. Tócavos escoller!