Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
A piques de se crear a Conferencia Sur da LNB

A billarda esténdese polo mundo e é unha cousa de non parar

Vieiros falou con Moisés Álvarez, promotor da billarda (ou pincha) no sur do país, que conta ter armado un equipo potente para competir en Meaño, na Guagua, o 27 de marzo.

Redacción - 09:00 25/01/2008

O ano pasado botaba a andar a Conferencia NorOeste da auténtica, e daquela había na Liga Nacional de Billarda dúas conferencias (esta e máis a NorLeste, a primeira delas), con cadansúa competición propia, que se habían ver as caras entre si na finalísima do 18 de maio; o play-off a desenvolver en Compostela.

Mais agora temos conferencia nova. A xente do sur tamén quere darlle á billarda pola súa zona, ou como di Moisés Álvarez, facer unha pincha.

A cousa comezou ao tempo que arrincaba a Liga Nacional de Billarda. Contoullo a Vieiros Moisés Álvarez, un mozo do Piñeiro, unha aldea da parroquia de Sanguiñeda, en Mos.

Vieiros: É certo iso que din de que andades a facer unha conferencia propia os do sur?

Moisés Álvarez: Aínda estamos tentando arrincala, pero hai vontade en distintos puntos do sur, coma Mos, Meaño, Vigo e O Porriño. Daquela, hai 3 ou 4 anos, cando naceu a LNB, puxémonos en contacto cos seus promotores para felicitalos pola iniciativa, e quedamos en ir vendo as posibilidades de traela para o sur.

Danse as circunstancias de que xa se estendeu á Coruña (fala da Conferencia NorOeste, creada o ano pasado e que xa compite esta tempada) e nós andamos traballando nisto. Andamos xuntando xente e pensamos estrearnos tal vez no campionato de Meaño, do 27 de abril; ou nos play-off finais en Compostela. Estamos arranxando todo con vistas a que na tempada que vén, 2008-2009, haxa xa unha Conferencia Sur.

Daquela, xa xogabades á billarda por estas terras?
Nós chamámoslle pincha e xogabamos por tempadas. De pequeno, na miña aldea, xogábase un tempo, non sei por que, á pincha; e logo outro ao trompo, cando tocaba. Eu xoguei toda a vida, e, anos despois falei con xente que seguía xogando en ocasións puntuais, e comezamos a xuntarnos para xogar.

Somos un grupo de xente de vinte a trinta e pico anos e estamos moi emocionados de volver xogar; é estupendo! De feito, eu creo que son da última xeración da miña aldea que xogaba á pincha.

Pero as vosas regras deben de ser ben diferentes das do NorOeste e NorLeste, non é?

Son moi diferentes! Pero imos ir vendo se nos podemos adaptar a eles! Supoño que terminaremos por apostar por ter un estándar. Habemos simplificar! Así podemos dar co nivel no que xogan eles para poder competir nos play-off e noutros torneos.

O primeiro partido serio sería en Meaño, como contas... e, estades listos para chegar e arrasar?
O que estamos é preparándonos e poñéndonos ao día. Eu até fixen o outro día unha pincha para practicar...

No que andamos agora é en organizar todo, vendo que outra xente e outros grupos poderían xuntarse para facer a liga. A semana que vén imos poñer a andar o noso medio de comunicación, o blog da Conferencia Sur, coa esperanza de que se vaia xuntando xente para facer os equipos.


Ligazóns

5/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



A billarda non entende de idades nin de lugares do mundo... esténdese sen máis
A billarda non entende de idades nin de lugares do mundo... esténdese sen máis
A instrumentación precisa para darlle á billarda ou á pincha
A instrumentación precisa para darlle á billarda ou á pincha
Emocionantes momentos da competición
Emocionantes momentos da competición