Vieiros

Aínda que só vai pola súa quinta edición (polas 29 que se levan convocado do seu equivalente en castelán: o Julio Camba) o Premio Francisco Fernández del Riego para artigos xornalísticos en galego vaise consolidando. Nesta ocasión o xurado, presidido por Alfredo Conde e no que tamén estaban Víctor Fernández Freixanes, Manuel Fernández Areal e Xosé Carlos Valle Pérez, decidiu por unanimidade que o gañador sexa Santiago Lamas Crego, polo artigo Ventos, publicado o 18 de decembro en La Región.

Lamas Crego é xefe do Servicio de Psiquiatría do Complexo Hospitalario de Ourense. Ten publicado varios libros, entre os que destaca o ensaio Galicia Borrosa, un ensaio borroso (Ediciós do Castro, 2004), un interesante estudo sobre a borrosidade galega, aprezábel dende a retranca até o urbanismo. Ou o máis recente Ferrín e outras historias (Ediciós do Castro, 2007), no que trata diversos temas, coma o suicidio (a partir da obra do escritor ourensán, de aí o título), o Corto Maltés, ou as personalidades múltiples.

O premio, convocado por Caixanova, entregarase en maio, e está dotado con doce mil euros, ao igual que o Julio Camba para ertigos xornalísticos en castelán, que nesta ocasión foi para Andrés Trapiello polo texto Una violeta de España, publicado en La Vanguardia.