Vieiros

Os clowns galegos chegan ás Canarias, e como non podía ser de outra maneira, fano cheos de risas, acrobacias, pero tamén de solidariedade. Pallasos en Rebeldía e Coperactiva Cultural son, xunto co concello de Haría, os organizadores deste primeiro Festival Risactiva, caracterizado pola formación, a participación cidadá e a solidariedade con Chiapas.

Durante o primeiro fin de semana de abril (4, 5 e 6), este festival inclúe un apartado formativo, que estará composto por tres cursos: Iniciación ao clown, a esencia; que impartirá o director do festiclown, Iván Prado, outro curso de maxia, a cargo do mago Miguelillo, e por último, un obradoiro de risoterapia, de man do canario Alexander.

O espectáculo tamén conta coa participación d'Os Sete Magníficos + 1, que espertará as gargalladas do público cos seus espectáculos A saúde é o primeiro e O gordo e o calvo, mentres o mago Miguelillo engaiolará aos espectadores con Instantes Imaxinarios.

Fins solidarios

A recadación da venda de entradas e das inscricións dos cursos de formación destinarase á organización Pallasos en Rebeldía, que realizará unha acción solidaria en Chiapas (México), como xa se fai con outras citas coma o Festiclown e o Magiclown. Para rematar, os alumnos dos cursos de formación mostrarán o aprendido nun maraclown, que tamén aportará os beneficios á mesma causa.