Vieiros

Vieiros de meu Perfil


Máis Alá

Xestionado por Vieiros
RSS de Máis Alá
PREMIOS DA ACADEMIA

Luar na Lubre, mellor álbum de música tradicional do Estado

'Camiños da fin da terra' fíxose co galardón, nunha noite na que o 'Canto de andar' de Bieito Romero foi elixida mellor canción en galego.

Redacción - 11:40 04/04/2008

Os artistas e grupos galegos tiñan unha gran representación na XII edición dos Premios da Música, que este xoves entregou en Valladolid a Academia das Artes e das Ciencias. Había oito candidatos, aínda que finalmente os premiados quedaron en tres: Luz Casal que obtivo o premio á mellor canción do ano con Soy, Bieito Romero que na categoría de mellor canción en galego derrotou a Mercedes Peón (Aiché) e a Budiño e Xoel López (Ollos de auga), e sobre todo Luar na Lubre, que se converteu no protagonista galego da noite ao gañar o galardón ao 'mellor álbum de música tradicional' con Camiños da fin da terra.

Non foi, en cambio, a noite de Deluxe, que optaba ao premio ao mellor álbum de pop alternativo; nin a de Triángulo de Amor Bizarro, que co seu homónimo disco de debut eran candidatos ao de mellor álbum de rock alternativo. Tampouco gañou Baldo Martínez o premio do mellor disco de jazz, ao que optaba con Projecto Miño; nin Carlos Núñez, que con Cinema do mar, aspiraba ao de mellor disco de fusión.

É a sétima vez que Luar na Lubre obtén un galardón nos premios entregados pola Academia da Música. En 1998 gañou o premio á 'mellor canción noutros xéneros musicais' por Tu Gitana; e na edición do 2000 o de 'mellor canción en galego' con Chove en Santiago, unha edición na que Cabo do Mundo foi elixido 'mellor disco de novas músicas'; o cuarto galardón obtido polo grupo chegou en 2002, cando se fixo co de 'mellor álbum en galego' polo seu disco de XV Aniversario; e o quinto ao ano seguinte, cando Devanceiros se fixo co premio á 'mellor canción en galego'. Finalmente, o seu sexto galardón é de 2005, de novo o de 'mellor canción en galego' con Hai un paraíso. Con todo, até o momento tan só Carlos Núñez trouxera para Galiza o premio ao mellor álbum de música tradicional do Estado con Carlos Núñez y amigos, en 2005


4.81/5 (37 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: