Vieiros

Os membros electos da Asemblea Constituínte reúnense esta cuarta feira por vez primeira nunha sesión histórica en que está previsto que se proclame a república en Nepal, poñendo fin a 240 anos de Monarquía. Dende ese momento, o rei Gyanendra disporá de quince días para abandonar o Palacio Real de Narayanhity.

A sesión estaba prevista para as 7.15 horas (hora galega) mais pospúxose para as 11.15 horas. Os desacordos que aínda persisten entre os maoístas, partido maioritario na Asemblea, e outros grandes partidos asinantes do acordo de paz son os causantes da demora.

Á espera do resultado da sesión, un milleiro de persoas congrégase nas proximidades da Asemblea, informan as axencias internacionais, malia que a Policía prohibiu as manifestacións.

Dous explosivos de pouca potencia estouraron esta mesma xornada e un outro o martes, provocando tres feridos. Grupos hindús e monárquicos poderían ser os responsábeis, xa que están a levar a cabo unha violenta campaña contra a perda do seu status diferenciado e oficial.