Vieiros

Compañías internacionais, alumnos de media Europa e artistas de renome deixaránse ver en Vigo entre o 31 de xullo e o 3 de agosto. Este verán a cidade olívica será a capital mundial do humor e poderemos ver nas súas rúas aos pallasos máis divertidos de todo o mundo no festival Mundoclown 2008.

A edición do Mundoclown deste ano está adicada ao recentemente finado Carlo Colombaioni, “o mellor clown moderno do mundo”, segundo palabras do director artístico do festival, Iván Prado. Colombaioni, quen fora padriño e aval internacional do Festiclown por todo o mundo, axudou a formar e dirixir as primeiras compañías estables de clown de Galicia, como “Os Sete Magníficos máis Un”.

Este xenial artista italiano meteu nos teatros a maxia dos pallasos, ten formado a milleiros de artistas e traballou con grandes do cinema, como Federico Fellini. Agora, o festival Mundoclown réndelle a homenaxe que merece nunha gala enchida de actuacións que lembrarán a súa figura.

Nesta edición non faltarán os cursos de Formaclown, que xa teñen aberto o plazo de inscricion para entrar a formar parte da familia máxica do clown.