O poeta palestino, un dos máis prestixiosos escritores árabes na actualidade, finou o sábado nos Estados Unidos despois dunha complicada operación cirúrxica.
Traducido a máis de vinte linguas, e galardoado con diversos premios internacionais, entre outros o Premio pola Liberdade Cultural da Fundación Lannan en 2001, o palestino Mahmud Darwish era xa considerado un clásico da literatura árabe contemporánea.
Na súa obra realizou emocionantes descricións da loita dos palestinos pola independencia, deulle voz á experiencia palestina no exilio, a ocupación e loitas internas. Escribiu entre outros "Estado de sitio", "O fénix mortal", "Menos rosas", "O leito dunha estraña" ou "Memoria para o esquecemento".
Na altura dos 67 anos, o seu pasamento tivo lugar nun hospital de Houston, en Texas, onde permanecía grave desde a operación cirúrxica a corazón aberto que lle realizaron o pasado mércores.
No titular lembramos un dos seus poemas, titulado "Para a nosa patria",
Para a nosa patria,
Próxima á palabra divina,
Un teito de nubes.
Para a nosa patria,
Lonxe das calidades do nome,
Un mapa de ausencia.
Para a nosa patria,
Pequena cal gran de sésamo,
Un horizonte celeste... e un abismo oculto.
Para a nosa patria,
Pobre cal á de perdiz,
Libros sacros... e unha ferida na identidade.
(...)