Vieiros

A Cámara de Comercio de Vigo e a Confederación de Empresarios de Pontevedra (CEP) teñen interese en poñer en marcha un proxecto económico e empresarial de apoio ao turismo na cidade de Vigo.

O proxecto baséase na creación dun museo adicado á batalla vivida en 1702 na enseada de San Simón. Segundo o arqueólogo Javier Luaces, hai trinta pecios afundidos na costa viguesa “en perfecto estado de conservación” grazas ao lodo e máis as condicións da ría de Vigo. Luaces comandou as últimas expedicións na busca dos restos dos galeóns de Rande e sinala que a súa recuperación será lenta e precisará dunha grande inversión presupostaria.

O presidente da CEP, José Manuel Fernández Alvariño, afirmou que nin empresarios nin institucións “podemos permitirnos o luxo de contar cun patrimonio artístico e cultural tan importante sen aproveitalo”.

O proxecto botará a andar cando as dúas institucións promotoras elaboren un estudo que valorará a viabilidade do mesmo e que ha ser presentado en novembro ás institucións competentes (Universidade de Vigo, Consellaría de Cultura, Deputación de Pontevedra e Concello de Vigo). O documento recollerá toda a información existente sobre a batalla de Rande, a viabilidade económica, as posíbeis localizacións e os prazos de execución que, dependendo do presuposto, se moverían entre os 2 e os 4 anos.

O Museo Vasa de Estocolmo
Este proxecto de apoio ao sector turístico da cidade de Vigo podería recibir unhas 400 mil visitas ao ano tendo en conta o exemplo do Vasamuseet da capital sueca. Este centro que, segundo lembra Luaces “recibe un millón de vistas anuais nunha cidade tres veces máis grande ca Vigo que conta con 70 museos”, amosa unha única peza na súa exposición: os restos do Vassa, un galeón afundido no día da súa botadura nas augas do fiorde de Estocolmo. A exhibición do barco converteuse nun dos principais atractivos culturais de Escandinavia.